eddielee 2010-9-2 12:28 PM
老婆老友齊賀39歲牛一 張智霖滿手禮物
上周五晚，壽星公張智霖同老婆靚靚及老死郭富城與老同學沈嘉偉，到銅鑼灣西苑開房食壽宴，牛一晚宴食足3個鐘，拿着滿手紙袋的壽星仔首先步出跟記者揮手Say Hello，然後輪到靚靚等人，問避鏡頭的城城有否送禮給壽星公，穿短褲如Little Boy的他得戚地說：「梗係有，份禮物好有意義㗎。」
雖然是正日生日，但壽星公當晚只穿恤衫加老牛出席壽宴，一班老死亦穿得非常輕便，眾人在貴賓房內又飲又食，11點多，拿着滿手禮物的Chi Lam首先步出，聽着記者的生日祝福，怕羞的他即時低頭講多謝，「好多禮物喎？靚靚呢？」記者大聲問，Chi Lam點頭後再如小朋友般將禮物逐一Show畀記者睇，「我老婆都喺度，未出嚟啫。」39歲的大細路歡欣地答。
貪玩城城
之後，素顏靚靚及TVB奀星梁烈唯跟着離開，前者對一切提問皆只以微笑作回答，而隨靚靚步出的I.T.集團話事人沈嘉偉只顧避開鏡頭講電話，城城亦有樣學樣，但問到他有否送禮，城城即轉身以高八度聲線回答：「梗係有啦。」還提到禮物非常有意義，兼叫記者估吓是那份禮物，靚靚為免城城繼續跟記者糾纏，返轉頭代答：「一支06年的紅酒，因為我個仔係嗰年出世。」然後拉着城城離開。